الحملة ابدت يا رجالة

الحملة القومية للحفاظ على الانسانية

انا و انت و رقصني يا جدع .. فاكرين الجملة دي خلاص بقت انا بس و كل حي يروح لحالة
انا و أخويا على ابن عمي و انا ابن عمي على الغريب .. حتى دي بقت عليا و على اعدائي

الناس اختلفت .. الافكار اختلفت .. المفاهيم اختلفت

الاخلاق .. آه من الاخلاق .. هو بقى فيه أخلاق .. طب داحنا زمان (الجملة بقت كتير قوي الايام دي)

عايزين نبدأ الحملة القومية للحفاظ على الانسانية من الشعب للشعب

عازين سلوجن جميل للحملة مفهوم الحملة زي ما طرحناه على بلوج نوارة كالآتي:

حملة توعية ازاى نحترم بعض و نحب بعض و نخاف على مشاعر بعض .. عشان الجفاء و الجفاف اللي في الشارع دول يهدوا شوية .. هدفي الطبقة اللي فوق شويه (ثقافيا) .. نبدأ من فوق .. و لما تنتشر هتلاقي اللي تحت مجبر .. انا متأكد من كده .. و يا سلام لو شوية بانرز .. ستيكرز .. حبشتكنات من اللي الناس بتحبها .. و الهدف جميل و الشعار أجمل .. (حس بيا) مثلا أو أي اقتراح .. و الله يا جماعة هيفرق معانا كتير كشعب اننا نبقى محترمين مع بعض و شوية شوية هتلاقي الموضوع وصل للتجار الجشعين .. و الموظفين المهملين .. و السواقين المبلطجين .. نين نين نين و هكذا

ممكن تساعدوني؟

اتشعبط يا سلام

اتشعبط يا سلام
استعبط يا سلام
اصل البعيد عوام
بيعوم الجنبين
يعرف يكون زمام
يعرف يطاطي لمين
ساعة السلام طرزان
ساعة الحصار ظربان

نفسه في يوم ننزاح
تبقى التكية براح
ولاحد يسأل فين
اكل العساكر فين؟
و عيالنا الصغيرين؟
دوا الحوامل فين؟
و عكاز المكسحين؟

بص ... شوف

مش كل اللي بص يبقى بالضرورة شاف

مش كل من حضر يبقى فهم المراد

مش كل من مشي في الطريق يبقى عنده اهداف


الفهم على قدر الاستيعاب.. اذا لازم نركز .. لازم نحدد الهدف .. كفايانا عشوائية و تخبط. كام واحد مننا محدد هدف؟ بلاش دي يمكن صعبة .. كام واحد مقرر هيعمل اسه السنة دي؟؟ الشهر ده؟؟ الاسبوع ده؟؟

طيب كام واحد كان ناوي يعمل حاجة في فترة زمنية و بعد ما خلصت قعد مع نفسه و ابتدا يدرس اللي حصل و ايه اللي تم و ايه اللي ماتمش و ما حصلش ليه.

كام واحد وضع خطة لفترة قادمة و بعدين وقف و قيم و صحح المسار؟

كام واحد قعد مع نفسة و فكر في حاجة غير احلام اليقظة؟؟

كام واحد فاهم يعني ايه واقع .. مش ايه هو الواقع لا يعني ايه واقع هيفيدني في ايه اني اعرف الواقع؟؟

ده دور العقل اللي احنا غيبناه بطرق كتييييييييييير جدا و للاسف في الاخر نسيناه